នៅព្រឹកថ្ងៃចន្ទ ៩កើត ខែជេស្ឋ ឆ្នាំមមី អដ្ឋស័ក ព.ស២៥៧០ ត្រូវនឹងថ្ងៃទី២៥ ខែឧសភា ឆ្នាំ២០២៦ និយ័តករបរធនបាលកិច្ច (ន.ប.ធ.) និងអង្គភាពស៊ើបការណ៍ហិរញ្ញវត្ថុកម្ពុជា (ស.ហ.ក) បានសហការរៀបចំសិក្ខាសាលាផ្សព្វផ្សាយអំពី “គោលការណ៍ណែនាំស្តីពីវិធានការយកចិត្តទុកដាក់ស្គាល់អតិថិជនក្នុងវិស័យបរធនបាលកិច្ច និង សេចក្តីណែនាំស្តីពីវិធានការយកចិត្តទុកដាក់ស្គាល់អតិថិជនក្នុងក្របខ័ណ្ឌប្រឆាំងការសម្អាតប្រាក់និងហិរញ្ញប្បទានភេរវកម្ម” ដល់បរធនបាល និងបុគ្គលពាក់ព័ន្ធដែលផ្តល់សេវាក្នុងវិស័យបរធនបាលកិច្ច ក្រោមអធិបតីភាពរបស់ ឯកឧត្តម សុខ ដារ៉ា អគ្គនាយកនៃ ន.ប.ធ. និង ឯកឧត្តម ហេង បូមករា ប្រធានអង្គភាពស៊ើបការណ៍ហិរញ្ញវត្ថុកម្ពុជា នៅអាគារមជ្ឈមណ្ឌលអភិវឌ្ឍធុរកិច្ច។ សិក្ខាសាលានេះរៀបចំឡើងក្នុងគោលបំណង ក្នុងការលើកកម្ពស់ការយល់ដឹង និងបង្កភាពងាយស្រួលដល់ការអនុវត្តមុខងាររបស់ប្រតិបត្តិករក្នុងវិស័យបរធនបាលកិច្ច និងជាបុគ្គលរាយការណ៍ ដែលត្រូវប្រតិបត្តិតាមវិធានការយកចិត្តទុកដាក់ស្គាល់អតិថិជនក្នុងវិស័យបរធនបាលកិច្ច (KYC) និង វិធានការយកចិត្តទុកដាក់ស្គាល់អតិថិជន (CDD) ក្នុងក្របខ័ណ្ឌប្រឆាំងការសម្អាតប្រាក់និងហិរញ្ញប្បទានភេរវកម្ម ព្រមទាំងដើម្បីត្រៀមខ្លួន និងបន្តរក្សាបាននូវលទ្ធផលវាយតម្លៃវិស័យបរធនបាលកិច្ចថាជាវិស័យដែលមានហានិភ័យកម្រិតទាប ដូចមានក្នុងរបាយការណ៍ស្ដីពីការវាយតម្លៃហានិភ័យថ្នាក់ជាតិស្ដីពីការសម្អាតប្រាក់និងហិរញ្ញប្បទានភេរវកម្មលើកទី២ (NRA II) កាលពីថ្ងៃទី២៥ ខែកុម្ភៈ ឆ្នាំ២០២៦។ ការរៀបចំសិក្ខាសាលានេះ អនុលោមតាមអនុសាសន៍ និងស្ដង់ដាអន្តរជាតិរបស់ ក្រុមការងារហិរញ្ញវត្ថុ (FAFT), ក្រុមត្រួតពិនិត្យនិងវាយតម្លៃ នៃវេទិកាសកលស្ដីពីតម្លាភាព និងការផ្លាស់ប្ដូរព័ត៌មានដើម្បីគោលបំណងពន្ធ (Global Forum នៃ OECD) ក្រុមការងារពាក់ព័ន្ធនឹងការរៀបចំស្ថិរភាពហិរញ្ញវត្ថុ (Financial Stability)។