នៅព្រឹកថ្ងៃព្រហស្បតិ៍ ២រោច ខែផល្គុន ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី៥ ខែមីនា ឆ្នាំ២០២៦ និយ័តករបរធនបាលកិច្ច (ន.ប.ធ.) បានរៀបចំសិក្ខាសាលាផ្សព្វផ្សាយ “ប្រកាសស្ដីពីការដាក់ទណ្ឌកម្មខាងវិន័យ​ចំពោះបុគ្គលរាយការណ៍ក្នុងវិស័យបរធនបាលកិច្ចដែលមិនអនុវត្តតាមច្បាប់ស្ដីពីការប្រឆាំងការសម្អាតប្រាក់និងហិរញ្ញប្បទានភេរវកម្ម” ក្រោមអធិបតីភាព​ដ៏ខ្ពង់ខ្ពស់របស់ ឯកឧត្តម សុខ ដារ៉ា អគ្គនាយកនៃ ន.ប.ធ. នៅអាគារមជ្ឈ​មណ្ឌល​​អភិវឌ្ឍធុរកិច្ច។ សិក្ខាសាលានេះ ត្រូវបានរៀបចំឡើងក្នុងគោលដៅ​ផ្សព្វផ្សាយដល់ក្រុមហ៊ុនបរធនបាល, បរធនបាលរូបវន្តបុគ្គលឯករាជ្យ និង​ប្រតិបត្តិករបរធនបាល ដែលជាបុគ្គលរាយការណ៍ក្នុងវិស័យបរធនបាលកិច្ច ឱ្យយល់ដឹងបន្ថែមអំពីកាតព្វកិច្ច និងការទទួលខុសត្រូវក្នុងវិធានការយកចិត្ត​ទុកដាក់ស្គាល់អតិថិជន ការរក្សាទុកឯកសារ កម្មវិធីសម្រាប់ទប់ស្កាត់ការ​ប្រឆាំង​​ការសម្អាតប្រាក់និងហិរញ្ញប្បទានភេរវកម្ម និងកាតព្វកិច្ចផ្សេងទៀត ដើម្បីលើកកម្ពស់សកម្មភាពប្រឆាំងការសម្អាតប្រាក់និងហិរញ្ញប្បទានភេរកវម្ម ក្នុងគោលបំណងជំរុញអនុលោមភាពតាមច្បាប់ស្ដីពីការប្រឆាំងការសម្អាតប្រាក់និងហិរញ្ញប្បទានភេរវកម្ម ព្រមទាំងស្របតាមអនុសាសន៍របស់​ក្រុមការងារ​ហិរញ្ញវត្ថុ (FATF)។