នាព្រឹកថ្ងៃអង្គារ ១១រោច ខែមិគសិរ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១៦ ខែធ្នូ គ.ស.២០២៥ និយ័តករបរធនបាលកិច្ច, និយ័តករមូលបត្រកម្ពុជា, និយ័តករធានារ៉ាប់រងកម្ពុជា និងវិទ្យាស្ថានខេមអេដ និងដោយមានការគាំទ្រពីក្រុមហ៊ុន ស្ត្រងហូល ត្រាសធី ឯ.ក បានសហការគ្នារៀបចំកម្មវិធីសិក្ខាសាលាស្តីពី “ច្បាប់ក្ស័យធន” នៅទីស្តីការអាជ្ញាធរសេវាហិរញ្ញវត្ថុមិនមែនធនាគារ (អ.ស.ហ.) ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា, ឯកឧត្តម សុខ ដារ៉ា អគ្គនាយកនៃនិយ័តករបរធនបាលកិច្ច និង ឯកឧត្ដម ប៊ូ ច័ន្ទភីរូ អគ្គនាយកនៃនិយ័តករធានារ៉ាប់រងកម្ពុជា។ សិក្ខាសាលានេះត្រូវបានរៀបចំឡើងក្នុងគោលដៅដើម្បីពង្រឹងសមត្ថភាពមន្រ្តីនៃនិយ័តករមូលបត្រកម្ពុជា, និយ័តករបរធនបាលកិច្ច និងនិយ័តករធានារ៉ាប់រងកម្ពុជា លើនីតិវិធីនៃការក្ស័យធន, កំណត់នីតិវិធី និងលក្ខខណ្ឌសម្រាប់ដោះស្រាយស្ថានភាពដែលបុគ្គល ឬអាជីវកម្ម មិនអាចសង់បំណុលបាន តាមកាលកំណត់ និងការទទួលខុសត្រូវ និងដើម្បីអាចបំពេញបន្ថែមលើបទប្បញ្ញត្តិស្ដីពីក្ស័យធននៃវិស័យទាំង ៣។ កម្មវិធីនេះ មានការអញ្ជើញចូលរួមពីថ្នាក់ដឹកនាំជាន់ខ្ពស់ និងមន្ត្រីជំនាញ នៃនិយ័តករទាំង ៣, ក្រុមហ៊ុនពាក់ព័ន្ធក្នុងវិស័យទាំង ៣ និងវាគ្មិនកិត្តិយស លោកបណ្ឌិត ព្រំម វីរៈ ប្រធានក្រុមប្រឹក្សាភិបាល នៃវិទ្យាស្ថាន ខេមអេដ។