នារសៀលថ្ងៃសុក្រ ១ កើត ខែមិគសិរ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២១ ខែវិច្ឆិកា គ.ស.២០២៥ ឯកឧត្ដម សុខ ដារ៉ា អគ្គនាយក នៃនិយ័តករបរធនបាលកិច្ច (ន.ប.ធ.) អមដោយសហការី បានអញ្ជើញដឹកនាំកិច្ចប្រជុំជាមួយសមាគមបរធនបាលកម្ពុជា តំណាងដោយ លោកបណ្ឌិត ព្រំ វិសុទ្ធ ប្រធានសមាគមបរធនបាលកម្ពុជា និងថ្នាក់ដឹកនាំ សមាជិក-សមាជិកា នៃសមាគម ដើម្បីពិភាក្សាអំពីការងារពាក់ព័ន្ធនឹងវិស័យបរធនបាលកិច្ច។ កិច្ចប្រជុំនេះបានផ្ដោតជាសំខាន់លើការរៀបចំនិងការប្រព្រឹត្តទៅរបស់សមាគម, ផែនការយុទ្ធសាស្រ្តក្នុងការជំរុញការអភិវឌ្ឍវិស័យបរធនបាលកិច្ច, ការអភិវឌ្ឍផលិតផលថ្មីៗ និងការពង្រីកទីផ្សារ, ទិសដៅ និងផែនការសកម្មភាពការងារពាក់ព័ន្ធនឹងការងារអភិវឌ្ឍវិស័យបរធនបាលកិច្ច។ សូមបញ្ជាក់ផងដែរថា យោងតាម “យុទ្ធសាស្ត្រអភិវឌ្ឍវិស័យបរធនបាលកិច្ច ឆ្នាំ ២០២៥-២០៣៥” និយ័តករបរធនបាលកិច្ច (ន.ប.ធ.) បានផ្តួចផ្តើម និងជំរុញឱ្យមានការបង្កើតសមាគមបរធនបាលកម្ពុជា ដែលចាត់ទុកថាជាផែនការសកម្មភាពអាទិភាពរយៈពេលខ្លីក្នុងការគ្រប់គ្រង និងការអភិវឌ្ឍវិស័យបរធនបាលកិច្ច។ ដោយមានការចូលរួម និងគាំទ្រពីក្រុមហ៊ុនបរធនបាល ប្រតិបត្តិករបរធនបាល បរធនបាលរូបវន្តបុគ្គលឯករាជ្យ និងបុគ្គលពាក់ព័ន្ធផ្តល់សេវាក្នុងវិស័យបរធនបាលកិច្ច, សមាគមបរធនបាលកម្ពុជា (Cambodia Trustees Association) ត្រូវបានបង្កើត និងទទួលបានការចុះឈ្មោះក្នុងបញ្ជីសមាគមសម្រាប់នីតិបុគ្គលនៅក្រសួងមហាផ្ទៃតាមរយៈប្រកាសលេខ ១២៦៤៨ ប្រក នៅថ្ងៃទី២១ ខែតុលា ឆ្នាំ២០២៥។ បន្ថែមពីនេះ បន្ទាប់ពីទទួលលិខិតស្នើសុំការការទទួលស្គាល់សមាគមបរធនបាលកម្ពុជា ចុះថ្ងៃទី២២ ខែតុលា ឆ្នាំ២០២៥ របស់សមាគមបរធនបាលកម្ពុជា និងការអនុញ្ញាតដ៏ខ្ពង់ខ្ពស់ពី ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្រ្តី រដ្ឋមន្រី្តក្រសួងសេដ្ឋកិច្ច និងហិរញ្ញវត្ថុ, ន.ប.ធ. បានប្រកាសការទទួលស្គាល់ជាផ្លូវការសមាគមបរធនបាលកម្ពុជាក្នុងកម្មវិធីវេទិកាបរធនបាលកិច្ច ឆ្នាំ២០២៥ កាលពីថ្ងៃទី៣១ ខែតុលា ឆ្នាំ២០២៥។