នៅថ្ងៃពុធ ១១រោច ខែចេត្រ ឆ្នាំម្សាញ់ សប្តស័ក ព.ស.២៥៦៨ ត្រូវនឹងថ្ងៃទី២៣ ខែមេសា គ.ស.២០២៥ ឯកឧត្តម សុខ ដារ៉ា អគ្គនាយកនៃនិយ័តករបរធនបាលកិច្ច (ន.ប.ធ.) អមដោយ លោកស្រី ឈាន សុខារី ប្រធាននាយកដ្ឋានកិច្ចការគតិយុត្តនិងអធិការកិច្ចនៃ ន.ប.ធ. និងក្រុមការងារ បានចូលរួមក្នុងសិក្ខាសាលា និងកិច្ចពិភាក្សាដែលរៀបចំដោយក្រុមហ៊ុន ឌីអេហ្វឌីអិល កម្ពុជា ក្រោមការគាំទ្ររបស់ សភាពាណិជ្ជកម្មអឺរ៉ុបនៅកម្ពុជាក្រោមប្រធានបទ “កាតព្វកិច្ចពន្ធចំពោះបរធនបាលកិច្ចនៅកម្ពុជា”។ កម្មវិធីនេះ រៀបចំឡើងក្នុងគោលបំណងបញ្រ្ជាបការយល់ដឹងឱ្យកាន់តែនិងទូលំទូលាយអំពី បែបបទ និងវិធានអនុវត្ត សារពើពន្ធចំពោះបរធនបាលកិច្ចនៅកម្ពុជា។ តាមរយៈប្រកាសស្តីពី វិធាន និងនីតិវិធីសារពើពន្ធចំពោះបរធនបាលកិច្ច លេខ១៩២ សហវ.ប្រក.អពដ ចុះថ្ងៃទី១២ ខែមីនា ឆ្នាំ២០២៥ បានធ្វើឲ្យកម្ពុជា មានវិធានអនុវត្តសារពើពន្ធច្បាស់លាស់ចំពោះបរធនបាលកិច្ច លើកកម្ពស់អភិបាលកិច្ចល្អ និងធ្វើឱ្យយន្តការបរធនបាលកិច្ចកាន់តែមានប្រសិទ្ធភាព ក៏ដូចជា ការអនុវត្តកាន់តែច្បាស់លាស់សម្រាប់ភាគីពាក់ព័ន្ធក្នុងបរធនបាលកិច្ច។ កិច្ចពិភាក្សាក្នុងកម្មវិធីនេះ មានការចូលរួមពីតំណាងបរធនបាល អ្នកជំនាញវិជ្ជាជីវៈ វិនិយោគិន និងក្រុមហ៊ុនពាក់ព័ន្ធ នៅ សណ្ឋាគារ Raffles Hotel Le Royal រាជធានីភ្នំពេញ។