នាព្រឹកថ្ងៃព្រហស្បតិ៍ ៨កើត ខែផល្គុន ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៦ ខែមីនា គ.ស.២០២៥ នៅមជ្ឈមណ្ឌលអភិវឌ្ឍធុរកិច្ច, និយ័តករបរធនបាលកិច្ច (ន.ប.ធ.) បានរៀបចំសិក្ខាសាលាស្ដីពី “អនុលោមភាពច្បាប់ និងការពង្រឹងការអនុវត្តច្បាប់ក្នុងវិស័យបរធនបាលកិច្ច” ក្រោមអធិបតីភាពរបស់ ឯកឧត្តម នង ពិសិដ្ឋ អគ្គនាយករងនៃ ន.ប.ធ. ដោយមានការចូលរួមពីក្រុមហ៊ុនបរធនបាល, បរធនបាលរូបវន្តបុគ្គលឯករាជ្យ, ក្រុមបរធនបាលនៃបរធនបាលកិច្ចហិរញ្ញវត្ថុ, ប្រតិបត្តិករបរធនបាល និងភាគីពាក់ព័ន្ធទាំងអស់ក្នុងវិស័យបរធនបាលកិច្ច សរុបចំនួន ១១០ រូប។ សិក្ខាសាលានេះ ត្រូវបានរៀបចំឡើងក្នុងគោលដៅបញ្ជ្រាបការយល់ដឹងផ្នែកអនុលោមភាពតាមច្បាប់ និងការពង្រឹងការអនុវត្តច្បាប់ក្នុងវិស័យបរធនបាលកិច្ច ដើម្បីធានាបាននូវសណ្ដាប់ធ្នាប់ និងរបៀបរៀបរយក្នុងប្រតិបត្តិការគ្រប់គ្រង ចាត់ចែង និងថែរក្សាទ្រព្យសម្បត្តិបរធនបាលកិច្ចស្របតាមច្បាប់ និងបទប្បញ្ញត្តិក្នុងវិស័យបរធនបាលកិច្ច។