ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្ដមអគ្គបណ្ឌិតសភាចារ្យ ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុ និងជាប្រធានក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ កាលពីថ្ងៃព្រហស្បតិ៍ ១រោច ខែមាឃ ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី១៣ ខែកុម្ភៈ គ.ស.២០២៥ ឯកឧត្តម សុខ ដារ៉ា អគ្គនាយកនៃនិយ័តករបរធនបាលកិច្ច បានអញ្ជើញចូលរួមជាវាគ្មិនកិត្តិយសធ្វើបទបង្ហាញ អំពីយន្តការបរធនបាលកិច្ចឥណទានកាបូននៅប្រទេសកម្ពុជា (Carbon Credits Trust Mechanisms in Cambodia) ក្នុងកម្មវិធីសិក្ខាសាលាស្ដីពី “ហិរញ្ញវត្ថុប្រកបដោយនិរន្តរភាព (Sustainable Finance)” នៅសាធារណៈរដ្ឋកូរ៉េ។ កម្មវិធីសិក្ខាសាលានេះ ត្រូវបានផ្តួចផ្ដើម និងសហការរៀបចំដោយស្ថាប័នចំនួន បី រួមមាន៖ សាកលវិទ្យាល័យ Yonsei, ធនាគារអភិវឌ្ឍន៍អាស៊ី (ADB) និង វិទ្យាស្ថានធនាគារកូរ៉េ ដោយវត្ថុបំណងសំខាន់នៃការរៀបចំគឺផ្ដោតលើវឌ្ឍនភាពនៃយន្តការហិរញ្ញវត្ថុប្រកបដោយនិរន្តរភាព និងការច្នៃប្រឌិតឌីជីថល ដែលផ្តោតជាសំខាន់ផងដែរលើការអភិវឌ្ឍហិរញ្ញវត្ថុឌីជីថលបៃតង និងការរាយការណ៍អំពីបរិស្ថាន សង្គម និងអភិបាលកិច្ច (ESG) ជាដើម។ កម្មវិធីនេះ មានការអញ្ជើញចូលរួមដោយ ថ្នាក់ដឹកនាំស្ថាប័នរដ្ឋ/ឯកជន សាស្ត្រាចារ្យ ទីប្រឹក្សា និងអ្នកជំនាញមកពីអង្គភាពនានា រួមទាំងសាកលវិទ្យាល័យ វិទ្យាស្ថានធនាគារ ក្រុមប្រឹក្សាស្តង់ដានិរន្តរភាព ធនាគារអភិវឌ្ឍន៍អាស៊ី ទីភ្នាក់ងារហិរញ្ញវត្ថុ និងបរិស្ថាន និងក្រុមហ៊ុនផ្តល់សេវាផ្នែកច្បាប់។