នាព្រឹកថ្ងៃពុធ ៦រោច ខែផល្គុន ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី១៩ ខែមីនា គ.ស.២០២៥ និយ័តករបរធនបាលកិច្ច (ន.ប.ធ.) បានរៀបចំសិក្ខាសាលាស្ដីពី "បរធនបាលកិច្ចទីផ្សាររូបិយវត្ថុ និងជម្រើសពាក់ព័ន្ធ" ក្រោមអធិបតីភាពរបស់ ឯកឧត្តម សុខ ដារ៉ា អគ្គនាយក នៃនិយ័តករបរធនបាលកិច្ច នៅមជ្ឈមណ្ឌលអភិវឌ្ឍធុរកិច្ច។ កម្មវិធីនេះត្រូវបានរៀបចំឡើង ដើម្បីចែករំលែកចំណេះដឹងដល់វិនិយោគិន និងតួអង្គពាក់ព័ន្ធក្នុងវិស័យបរធនបាលកិច្ចអំពី៖ ១-ឧបករណ៍បំណុលរយៈពេលខ្លីដែលមានគុណភាពល្អ ឬឧបករណ៍ហិរញ្ញវត្ថុផ្សេងទៀតដែលមានសន្ទនីយភាពខ្ពស់តាមរយៈយន្តការបរធនបាលកិច្ច ឧទាហណ៍ដូចជាបរធនបាលកិច្ចប្រាក់បញ្ញើអត្រាការប្រាក់ថេរជាដើម, ២-ការធ្វើពិធកម្មជម្រើសក្នុងការវិនិយោគតាមរយៈបរធនបាលកិច្ចទៅលើផលិតផលហិរញ្ញវត្ថុផ្សេងទៀតដែលផ្តល់ផលខ្ពស់ ហានិភ័យទាប ក្នុងខណៈពេលអត្រាការប្រាក់មានការធ្លាក់ចុះ ដូចជា៖ វិនិយោគលើមូលបត្ររដ្ឋ និងសញ្ញាបណ្ណសាជីវកម្មដោយផ្ទាល់ ឬ តាមរយៈយន្តការបរធនបាលកិច្ច និង ៣- ពិនិត្យនូវលំហរកាលានុវត្តភាពទាក់ទាញ និងការបង្កើតនូវជម្រើសបន្ថែមសម្រាប់វិនិយោគិនដែលមានអតិរេកសាច់ប្រាក់។ កម្មវិធីនេះមានការអញ្ជើញចូលរួមជាវាគ្មិនកិត្តិយសផ្ដល់បទបង្ហាញដោយ លោក ឃឹម ហ្វាដាណេ អគ្គនាយករង នៃអគ្គនាយកដ្ឋានសហប្រតិបត្តិការអន្តរជាតិ និងគ្រប់គ្រងបំណុល នៃក្រសួងសេដ្ឋកិច្ចនិងហិរញ្ញវត្ថុ និងលោក សេង ចាន់ធឿន នាយកប្រតិបត្តិ នៃក្រុមហ៊ុន រ៉ូយ៉ាល់គ្រុប សីឃ្យូរីធី ម.ក ផងដែរ ព្រមទាំងមានការអញ្ជើញចូលរួមពីប្រតិបត្តិករផ្តល់សេវាក្នុង វិស័យបរធនបាលកិច្ច និងតំណាងសមាគមធុរកិច្ច និងសភាពាណិជ្ជកម្មបរទេសជាច្រើននៅកម្ពុជាដូចជា សភាពាណិជ្ជកម្មកូរ៉េនៅកម្ពុជា សភាពាណិជ្ជកម្មអន្តរជាតិនៅកម្ពុជា និងសភាពាណិជ្ជកម្មចិននៅកម្ពុជាជាដើម។