នាព្រឹកថ្ងៃព្រហស្បតិ៍ ៧កើត ខែកត្តិក ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៧ ខែវិច្ឆិកា គ.ស.២០២៤, និយ័តករបរធនបាលកិច្ច (ន.ប.ធ.) បានរៀបចំសិក្ខាសាលាផ្សព្វផ្សាយស្តីពី "បរិស្ថានសាកល្បងបច្ចេកវិទ្យាហិរញ្ញវត្ថុក្នុងវិស័យបរធនបាលកិច្ច" ក្រោមអធិបតីភាពរបស់ ឯកឧត្តម ណី សាកល អគ្គនាយករងនៃ ន.ប.ធ. តំណាងដ៏ខ្ពង់ខ្ពស់របស់ ឯកឧត្ដម សុខ ដារ៉ា អគ្គនាយកនៃ ន.ប.ធ. អមដោយប្រធាន/ប្រធានស្តីទីនាយកដ្ឋាន និងសហការីនៃ ន.ប.ធ. ដោយមានការចូលរួមពីតំណាងថ្នាក់ដឹកនាំ-សាស្ត្រាចារ្យ និងនិស្សិតដែលជាតំណាងមកពីសាកលវិទ្យាល័យ និងគ្រឹះស្ថានអប់រំនិងបណ្តុះបណ្តាលវិជ្ជាជីវៈពាក់ព័ន្ធផ្នែកបច្ចេកវិទ្យា ក្នុងរាជធានីភ្នំពេញ។ សិក្ខាសាលានេះ ត្រូវបានរៀបចំឡើងក្នុងគោលបំណងដើម្បីផ្សព្វផ្សាយពីទិដ្ឋភាពទូទៅនៃបច្ចេកវិទ្យាហិរញ្ញវត្ថុ (Financial Technology-FinTech) និងបរិស្ថានសាកល្បងបច្ចេកវិទ្យាហិរញ្ញវត្ថុក្នុងវិស័យបរធនបាលកិច្ច (FinTech’s Regulatory Sandbox in the Trust Sector) ក៏ដូចជាគោលការណ៍ណែនាំស្តីពី “បរិស្ថានសាកល្បងបច្ចេកវិទ្យាហិរញ្ញវត្ថុក្នុងវិស័យបរធនបាលកិច្ច" (Guideline on FinTech’s Regulatory Sandbox in the Trust Sector) ដែលបានដាក់ឱ្យអនុវត្តជាផ្លូវការកាលពីថ្ងៃទី១២ ខែធ្នូ ឆ្នាំ២០២៣ កន្លងទៅ។