នាព្រឹកថ្ងៃពុធ ១រោច ខែភទ្របទ ឆ្នាំរោង ឆស័ក ព.ស.២៥៦៨ ថ្ងៃទី១៨ ខែកញ្ញា ឆ្នាំ២០២៤ និយ័តករបរធនបាលកិច្ច (ន.ប.ធ.) បានរៀបចំកម្មវិធីបណ្ដុះបណ្ដាលកសាងសមត្ថភាពមន្រ្តីស្តីពី “ការចែករំលែកបទពិសោធអំពីយន្តការបរធនបាលកិច្ចឥណទានកាបូននៅកម្ពុជា” ក្រោមអធិបតីភាពរបស់ឯកឧត្តម សុខ ដារ៉ា អគ្គនាយកនៃនិយ័តករបរធនបាលកិច្ច នៅទីស្ដីការអាជ្ញាធរសេវាហិរញ្ញវត្ថុមិនមែនធនាគារ។ កម្មវិធីបណ្ដុះបណ្ដាលនេះត្រូវបានរៀបចំឡើងក្នុងគោលដៅលើកកម្ពស់ការយល់ដឹង និងពង្រឹងសមត្ថភាពផ្ទៃក្នុងដល់មន្ត្រីនៃ ន.ប.ធ.។ កម្មវិធីនេះ មានការអញ្ជើញចូលរួមពីថ្នាក់ដឹកនាំជាន់ខ្ពស់នៃ ន.ប.ធ. និងមន្ត្រីជំនាញ, វាគ្មិនកិត្តិយស លោក អ៉ីង សុភាល័ក្ខ ប្រធានក្រុមហ៊ុន មេធាវី អនន្ត និងលោក CHEN, HAN-EN នាយកប្រតិបត្តិ នៃក្រុមហ៊ុន ស្រ្តងហូល ត្រាសធី ឯ.ក, តំណាងពីអគ្គលេខាធិការនៃអគ្គលេខាធិការដ្ឋានអាជ្ញាធរសេវាហិរញ្ញវត្ថុមិនមែនធនាគារ (អ.ស.ហ.) និងនិយ័តករ/អង្គភាពក្រោមឱវាទនៃ អ.ស.ហ. ។